Kaixo! Ongi etorri laugarren gaiko esperimentura! Oraingo honetan, soinua neurtuko dugu. Beraz, goazen lehenik eta behin Arduinoa martxan jartzera!
Horretarako, AA motako bi pila erabiltzen dituen pila-euskarria beharko duzue. Horri esker, aukera izango duzue Arduinoa ordenagailura konektatuta ez dagoenean ere erabiltzeko. Arduinoa martxan dagoela adierazteko argi berdea piztuta azalduko da. Bestalde, Arduinoa mikrofonora konektatu behar da. Mikrofonotik jasotako soinua Arduinora bidaliko da, eta Arduinoak datuak plataformara bidaliko ditu wifi bidez.
Horrez gain, ikus dezakezuenez, 3 kable daude; bakoitzak funtzio bat betetzen du. Urdina lur-hargunera konektatuta dago; berdea bost volteko elikaduraz arduratzen da; eta horiak datuak transmitituko ditu mikrofonoaren eta Arduinoaren artean.
Behin Arduinoa sentsorearekin muntatu ostean, Cloud plataformaren bitartez programazioa bidaliko diogu. Horrela, soinu-datuak jasotzeko eta plataformara bidaltzeko prest egongo da! Baina... nola jakin dezakegu datuak ondo jasotzen ari garela eta plataformara zuzen igotzen ari direla? Bada, oso erraz: mugikorreko aplikazio baten bitartez! Aplikazio horretan, hodeira edota Cloudera bidalitako informazioa ikus daiteke, baita informazio hori landu ere.
Bada, orain zuen txanda da! Aplikaziotik ateratako datuak aztertu beharko dituzue. Horretarako, Arduinoa martxan jarri beharko duzue. Eta gogoratu: edozein zalantza baldin baduzue, webgunean egiteko urrats guztiak dituzue. Ondo izan eta animo!