IoTetxea proposamen didaktiko bat da, zeinetan ikasleek IoT (Internet of Things) teknologia erabiliz ikasteko aukera duten, proiektuen bitartez alderdi teorikoak eta praktikoak uztartuz. Teknologia eta joera berriak ikaskuntza-prozesuetan txertatzea bilatu da, ikasleentzat erakargarriagoa eta hurbilagoa izan dadin eta horrela haien motibazioa susta dadin.
Ikastetxean edota etxean egin daitezkeen proiektuak dira, eta talde-lana, ikerketa eta hausnarketa sustatzea dute helburu.
Material hauek herritarren zientzia-kontzeptuaren barruan kokatu daitezke; izan ere, Derrigorrezko Bigarren Hezkuntzako ikasleek egiteko pentsatuak daude, betiere irakasle baten laguntzarekin, eta arazoak identifikatzea, baliabideak partekatzea, gaiak proposatzea, datuak biltzea eta aztertzea eta zabaltzen laguntzea dute helburu. Laburbilduz, ikasleek ikerketa-prozesuetan aktiboki parte hartzen dute.
Guztira 7 proiektu dira; proiektu bakoitzean gai bat jorratu da, honela egituratuta:
- Burutuko den proiektua kokatzeko, gaiaren inguruko sarrera bat egingo da (ikastaldearen mailaren arabera, irakasleak sarrera honetan sakondu dezake).
- Arduino MKR WiFi 1010 plaka eta sentsore apropos bat erabiltzean oinarritutako IoT proiektua.
- Material gehigarriak lortzeko mugikorreko teknologia datu-iturri gisa erabiltzeko proposamena.
- 3 jardueraren proposamena: bat IoT proiektuan oinarrituta, eta beste biak Big Data tankerako gaiekin lotuta.
Zergatik erabili IOTetxea?
- Teoriaren eta praktikaren arteko hezkuntza-hutsunea betetzen du.
- Herritarren zientziako kontzeptuak biltzen ditu.
- IoT/Big Datari lotutako etorkizuneko lanbideen eremu baterako atea irekitzen du, non eskari handia dagoen enpresetan, startupetan, ikerketa-zentroetan…
- Etorkizunean, berez, lanbide ez-teknologikoak direnetan (gizarte-arloa, osasuna…) berrikuntza eta teknologia berriak integratzeko aukera eskaintzen du.
Norentzat bideratu da nagusiki?
- Irakasleak ikasleekin.
- Irakasleak ikasle eta gurasoekin/zaintzaileekin.
- Ikasle-taldeak (gainbegiratuta).
Nola erabili IotEtxea-k eskaintzen dituen baliabideak?
Proposatutako proiektuek IoT bitartez zer egin dezakegun erakusten digute. Gainera, erraz birkonbina eta edita daitezke, proiektu bakoitzean eXeLearning (elp) formatuan diseinatu diren fitxategiak eransten baitira.
Proiektu bakoitza definitzeko, alderdi hauek hartu dira kontuan:
- Ikasgelako eguneroko lanean erraz txerta daitezkeen kontzeptuak erabiltzea, ikasleek erraz ezagut ditzaketenak: tenperatura, presioa, soinua…
- Era transbertsalean eta arlo desberdinetako irakasleen laguntzarekin egiteko prestatuta dago. Kultura zientifikoa ardatz hartuta, bestelako ikasgaietan ere landu daitezke.
- Ikasleen etxeetan gurasoen, tutoreen, zaintzaileen… laguntzarekin ere egingarriak izatea.
- Aurkeztutako proiektuen % 80an osasunari, fisikari, meteorologiako efektuei eta abarri erreferentzia egitea, egunerokotasunean eta eztabaidetan agertzen diren bizitzako eta gizarteko gaien inguruko kontzeptu teorikoak ulertzen laguntzeko.
- Erabilitako lizentzia ahalik eta irekiena (cc) izatea.
- Gastu baxua. Proiektu gehienetan, beharrezko material bakarra Arduino MKR WiFi 1010 plaka, Arduino Cloud IoT plataformako kontua eta sentsore bat dira. Horien kostua gutxi gorabehera 60-90 euro bitartekoa da. Proiektu bakoitzean aldatzen den gauza bakarra sentsore-mota da; beste guztia berdin mantentzen da.
- Material estandarra da, eta 5 urtez gutxienez berrerabil daiteke.
- Ikasleen eta irakasleen begiak IoT teknologiaren alorrera zabaltzen saiatu gara.
- Proposatutakoak baino askoz proiektu gehiago egin daitezke, aurkeztutako proiektuetako ideiak sinplifikatuz, zabalduz edota aldatuz.
Ebaluazioa
Proiektuek ebaluatzeko modu anitz aurreikusten dituzte. Alderdi horretatik, etengabeko berrelikadura emango zaie ikasleei ikaskuntza-prozesu osoan. Ebaluatzeko tresna hauek proposatzen dira:
- Autoebaluazioa: norberak bere lana eta egindako aurrerapena ebaluatzeko konpromisoa hartu beharko du, baita hobekuntza-arloei buruz hausnartzekoa ere.
- Koebaluazioa: ikasleek elkar ebaluatu beharko dute. Parekoen ebaluazio-mota bat da, nahiz eta irakasleak prozesuaren gidari gisa jardun beharko duen.
- Heteroebaluazioa: kasu honetan, ebaluatzeko ardura irakaslearena da. Haren lana izango da ikasleak egindako zereginak aztertzea, ikaslearen parte-hartzea kontuan izatea, egin diren lanen kalitatea baloratzea, eta abar.
Webgunearen egitura
Lana WordPress formatuan egindako webgune baten bidez erakusten da, eXeLearning-ekin egindako proiektuetarako estekak eta gida didaktikoen edukia biltzen dituena.
Webgunearen mapa: https://iotetxea.com/sitemap/
YouTuben ere erabilgarri al daude baliabideak? Proiektuarekin lotutako bideoak YouTubeko erreprodukzio-zerrenda batean daude:
https://www.youtube.com/playlist?list=PLqqKmwYwNAlOVXmUG5sjwTn6bnZY_t96O