Soinu-kutsadura

Neurketa akustikoa

Neurketa akustikoak une eta leku jakin bateko dezibel-mailaren neurketak dira. Datuak jasotzeko, zarata-maila kuantifikatzen duen sonometro bat erabiltzen da. Zarata neurtzeko unitateak –dezibelak– soinu-presioaren bi balioren arteko harremana adierazten du.

Zarata-maila altua izateak nekea eta estresa eragin diezaieke irakasleei, eta, gainera, arreta- eta ikaskuntza-prozesuak zaildu ditzake.

Osasunaren Mundu Erakundearen arabera, ikasgela batean 35 dezibeleko maila izatea gomendatzen da. Irizpide horren arabera, Madril eta Bartzelona bezalako hirietako ikastetxe gehienek muga hori gainditzen dute, askogatik gainera: eskola-orduetan, esaterako, kanpoko zarataren batezbestekoa 53 eta 76 dB bitartekoa izaten da.

Zaraten neurketa batean, 65 dB-ko maila ozenki hitz egiten ari den jende-talde baten parekoa da, edota gainezka dagoen jatetxe bat, belarritik gertu jotzen ari den telefono bat, eta abar.

Historia-apur bat

Dezibel terminoa XX. mendearen hasieran sortu zen, telegrafoa komunikabiderik bizkorrena eta herrikoiena bihurtu zenean. Kableatu-linea batek izandako galerak kuantifikatzeko beharra zela eta, bel izeneko neurria proposatu zuten Bell laborategiek (konpainiaren sortzailearen omenez: Alexander Graham Bell). Funtsean, transmisio-linearen indargabetze-faktorearen 10 oinarriko logaritmoa kalkulatzen zen. Baina neurria txikiegi gelditzen zitzaien, eta, horregatik, bel baten hamarrena erabiltzen hasi ziren. Horrela, dezibela sortu zuten arte.

Soinu-mailen adibideak

0 db. entzumen-atalasea, isiltasuna.
0-10 dB (5 dezibel): soinu-maila oso baxuak, ia hauteman ezin daitezkeen soinuak. Arnasketa lasaia edota zaratarik gabe eta isolatuta dagoen haitzuloa, adibidez.
10-20 dB (15 dezibel): soinu-maila oso baxuak (xuxurlak, urratsak...).
20-30 dB (25 dezibel): soinu-maila baxua. Adibidez, liburutegi batean, jendea isilik dagoen lekuetan, grabazio-estudioetan, isolatuta eta hutsak dauden geletan, haize arinarekin zuhaitzetako hostoak mugitzen direnean...
30-40 dB (35 dezibel): soinu-maila ertaina (elkarrizketa normal bat, jarduera gutxiko gela bat, egun lasai bat mendian, olatu txikiak itsasoan, bizitegi-eremu lasai bat...).
40-50 dB (45 dezibel): soinu-maila normala. Jendez betetako gela bat, bulego bat, etxetresna elektriko batzuk, jende gutxi dabilen kale bat...
50-60 dB (55 dezibel): soinu-maila apur bat altua. Adibidez, xurgagailua edota irabiagailua bezalako hainbat etxetresna elektriko, jende-kontzentrazioa kalean, jarduera handiko bulegoa, mugimendu askoko kale bateko trafikoa, bolumen ertainean jarrita dagoen telebista...
60-70 dB (65 dezibel): zarata-maila handia. Esaterako, jende asko ozenki hitz egiten, jendez jositako jatetxea, belarritik hurbil joka ari den telefonoa.
70-80 dB (75 dezibel): soinu maila oso altua. 75 dezibeletatik gora, zaratak kalteak eragin ditzake: oihuka eztabaidatzea, hiri bateko zirkulazioa, etxetresna oso zaratatsuak, gertu dagoen motor zaratatsu bat, hegazkin baten barnealdea...
80-90 dB (85 dezibel): maila honetako zarata kaltegarria izan daiteke denbora luzean. Tren bat, fabriketako makineria, suhiltzaileen sirenak, manifestazio zaratatsuak.
90-100 dB (95 dezibel): zarata-maila honek eragozpenak sortzen ditu, eta kaltegarria izan daiteke (gertu dagoen suhiltzaileen sirena bat, auto-pilaketa batean egon daitezkeen klaxon-soinuak...).
100-120 dB (110 dezibel): maila arriskutsua. Distantzia txikian dagoen mailu pneumatiko bat, diskoteka bat, musika-kontzertu bat, petardoak, kirol-estadioak une erabakigarrietan, aireratzen ari den hegazkin bat, 1 formulako lasterketa...
120 dB-tik gora: mina eragiten du, eta entzumena galtzeko arriskua dago. 25 metro baino gutxiagora dagoen hegazkin baten aireratzea, edota leherketa handia.
180 dB: Krakatoa sumendiaren erupzioa 160 km-ra edo espazio-ontzi bat aireratzen.
180 dB-tik gora: heriotza eragin dezake.

Soinu-maila neurtzen duten monitoreak

Proiektu honen bitartez, gure inguruko zarata-maila –ikasgelakoa, jolastokikoa, etxeko egongelakoa– neurtzen duen gailu bat sortzen saiatuko gara.

Horretarako, ondorengo hauek beharko ditugu:

Egin nahi dugun neurketa jasotzen duen MAX9814 sentsorea.
Sentsorearen eta Arduino Cloud plataformaren arteko zubia egingo duen ARDUINO MKR WiFi 1010 plaka.
Jasotako datuak gordetzeko erabiliko den Arduino Cloud plataforma.

Ondoko lizentziak babestua Creative Commons: aitortu-PartekatuBerdin 4.0 Lizentzia